Sipòte Nou
SPRINGFIELD, OH – Haitian Community Alliance (HCA) lanse yon apèl ijan pou yon nouvo lidèchip pandan li ap prepare pou yon tranzisyon enpòtan. Aprè reyinyon ki fèt 15 fevriye 2025, gen kat pozisyon kle – Prezidan, Sekretè, Trezorye, ak Pòtpawòl – ki bezwen nouvo moun pou asire avni òganizasyon an.
Lidèchip aktyèl la te mete gwo efò pou sipòte kominote a atravè plizyè inisyativ tankou mentora, sèvis tradiksyon, fòmasyon sou sekirite wout, ak kolaborasyon ak otorite lokal yo. Malgre reyalizasyon sa yo, defi administratif yo te kontinye egziste, sa ki fè yon nouvo lidèchip esansyèl vinn nesesè pou evite yon vakyòm ki ta mete HCA ak sèvis li yo an danje.
Yon Apèl Ijan pou Nouvo Lidè
HCA pa ka avanse san manm angaje ki pare pou mete men nan pat la. Se yon opòtinite pou chak Ayisyen ki vle fè yon diferans nan kominote a. Kominote a bezwen volontè, lidè angaje, ak moun ki gen vizyon pou asire ke travay HCA ap kontinye e grandi.
Se moman pou aji!
Nou ankouraje chak manm kominote a ki gen pasyon pou ede rantre an kontak ak HCA pou pran responsablite sa yo. Si nou pa aji kounye a, nou riske pèdi yon òganizasyon ki te tap defann enterè nou yo.
Nouvo lidè yo ap monte pandan peryòd tranzisyon ki soti 18 fevriye pou rive 19 mas 2025. Pa kite tan pase! Kontakte HCA jodi a pou w wè kijan ou ka kontribye.
Si w vle ede oswa w gen kesyon, kontakte HCA!
